Glynn Vivian yn dod yn Oriel Gelf Noddfa gyntaf y DU

Oriel Gelf Glynn Vivian Cyngor Abertawe yw’r oriel gyntaf yn y DU i dderbyn gwobr Oriel Gelf Noddfa.

Mae’r Gwobrau Noddfa, a gefnogir gan fudiad Dinas Noddfa’r DU, yn dathlu ymrwymiad sefydliad i sicrhau croeso cynnes a chynwysoldeb i bawb. 

Y llynedd, dathlodd Abertawe 10 mlynedd fel Dinas Noddfa, ac mae gwobr yr oriel yn helpu i ddangos cefnogaeth barhaus yr ardal i ffoaduriaid a phobl sy’n ceisio lloches.

Dros y chwe blynedd diwethaf, mae’r Glynn Vivian wedi gweithio gyda Dinas Noddfa Abertawe i gynnig sesiynau celf wythnosol dan arweiniad ffoaduriaid a phobl sy’n ceisio lloches yn y gymuned leol.

Meddai Aelod y Cabinet Robert Francis-Davies, “Mae Abertawe’n ddinas groesawgar ac mae ein sector diwylliannol yn chwarae rhan enfawr yn hynny.”

Cynhaliwyd digwyddiad Dinas Noddfa yn Theatr Volcano yng nghanol dinas Abertawe ar 12 Tachwedd. Yma derbyniodd yr oriel ei statws newydd yn swyddogol.

Gyda chefnogaeth grant Cymryd Rhan Cyngor Celfyddydau Cymru a Chyfeillion y Glynn Vivian, mae’r oriel yn darparu gweithdai, digwyddiadau, adnoddau celf a deunyddiau i bobl.

Mae’r pandemig wedi arwain at greu baner croeso; mae hon wedi’i harddangos yn yr oriel a bydd yn cael ei harddangos yn Amgueddfa Genedlaethol y Glannau y flwyddyn nesaf.

Mae prosiectau eraill gan grŵp croeso’r oriel wedi cynnwys arddangosfeydd cymunedol yn y Glynn Vivian, arddangosfa fosaig yn Ysbyty Treforys a phortreadau cyfranogwyr ar hysbysfyrddau o amgylch ardal Bae Copr sy’n dod i’r amlwg yng nghanol y ddinas.

Meddai Funmilayo Olaniyan, Aelod o’r Pwyllgor Dinas Noddfa a cheisiwr lloches, “Mae’r Glynn Vivian yn gwneud gwaith gwych. Mae staff ac ymwelwyr yno’n dysgu o geiswyr lloches ac yn eu cynnwys mewn gweithgareddau creadigol.”

“Trwy’r cyfyngiadau symud, roeddent wedi cynnwys ceiswyr lloches mewn nifer o ddigwyddiadau ar-lein.

“Mae eu harddangosfeydd yn cynyddu ymwybyddiaeth yn y gymuned ehangach o geiswyr lloches. Mae hyn wrth wraidd yr hyn y mae Dinas Noddfa Abertawe’n ei wneud.”

Meddai Thanuja Hettiarachchi, ffoadur a chydlynydd rhaglen dengmlwyddiant Dinas Noddfa  Abertawe, “Mae’r Glynn Vivian yn gwneud popeth o fewn ei gallu i gynnwys ceiswyr noddfa yn eu holl weithgareddau.”

“Er enghraifft, fe ddarparon nhw gardiau bws gan ganiatáu i bobl a oedd yn newydd i’r ddinas ymuno â gweithgareddau gyda phobl leol eraill.

“Yn ystod y pandemig, mae Oriel Gelf Glynn Vivian wedi cadw pawb yn brysur fel rhan o’r gymuned lawn, nid trefnu pethau’n arbennig ar gyfer ceiswyr lloches a ffoaduriaid.”

Meddai Karen MacKinnon, curadur y Glynn Vivian, “Rydym wrth ein boddau i ddod yn Oriel Noddfa gyntaf y DU.”

“Sefydlodd ein cydweithwyr Dan a Richard y Grŵp Croeso dros chwe blynedd yn ôl i greu lle diogel a sicrhau bod creadigrwydd ar gael i bawb yn Abertawe.

“Yn yr oriel, rydym yn credu bod celf yn gallu newid bywydau, cefnogi iechyd a lles gan greu cymdeithas fwy cynhwysol a helpu’r rheini sy’n cael trafferth.”

Meddai Siân Summers-Rees, Prif Swyddog Dinas Noddfa’r DU “Mae’r Glynn Vivian yn adlewyrchu ein cysyniad o noddfa drwy gelfyddydau’n wych.”

“Mae’n lleihau rhwystrau ac yn cysylltu â phobl sydd wedi cael profiad o geisio lloches.

Mae hyn yn digwydd yn ystod gweithgareddau creadigol ar y cyd â’r gymuned gynhaliol – mae’n cynyddu ymwybyddiaeth ac yn adeiladu gwydnwch, cyfeillgarwch a pherthnasoedd lle mae pobl yn cefnogi ei gilydd.”