Ym mis Gorffennaf 2024, bydd Oriel Gelf Glynn Vivian Cyngor Abertawe yn agor arddangosfa newydd, Out of this World, gan yr artist Heather Phillipson, a enwebwyd am Wobr Turner 2022.
Yn Out of this World, arddangosfa unigol fawr gyntaf yr artist o waith newydd ers ei henwebu am Wobr Turner, mae Heather Phillipson yn cofnodi dilyniant o amgylchiadau sonig ac atmosfferig sy’n cyfleu awyrle, awyrofod a’r gofod. Gan ymateb i gyfathrebiadau annaearol radar, sonar a ffenomenau awyr anhysbys, mae Phillipson yn llenwi orielau Glynn Vivian â synau awtomataidd wedi’u tiwnio a delweddau wedi’u disylweddu sy’n arnofio ac yn pylsadu, gan greu’r hyn y mae hi’n ei alw’n ‘niwl gweledol ac acwstig’. Mae’r niwl hwn, fel rhai agweddau ar ryfela, yn rhithweledol – yn cynhyrchu drychiolaethau, rhagfynegiadau a ffantasmagoria. Trwy roi sylw i sain fel grym sy’n trawsgyweirio deinameg ffisegol ac affeithiol, mae Out of this World yn mapio maes dirgrynol sy’n gweithredu bron yn feteorolegol.
Collage gwaith yr artist, trwy garedigrwydd yr artist.
Mae Out of this World yn rhan o Gronfa Etifeddiaeth14-18 NOW yr Amgueddfeydd Rhyfel Ymerodrol (IWM), rhaglen bartneriaeth genedlaethol sy’n cynnwys dros 20 o gomisiynau gan artistiaid a ysbrydolwyd gan dreftadaeth gwrthdaro. Dan arweiniad yr Amgueddfeydd Rhyfel Ymerodrol, crëwyd Cronfa Etifeddiaeth 14-18 NOW IWM yn dilyn llwyddiant 14-18 NOW, rhaglen gelfyddydau swyddogol y DU i nodi canmlwyddiant y Rhyfel Byd Cyntaf. Mae’r rhaglen gomisiynu gwerth £2.5 miliwn yn bosibl diolch i lwyddiant ffilm glodwiw Peter Jackson, They Shall Not Grow Old, a gomisiynwyd ar y cyd gan IWM a 14-18 NOW.
Meddai Heather Phillipson, “Mewn ffordd, mae fy holl waith yn ymwneud â gwrthdaro, o’r mud, mewnol a microcosmig, i’r cynddeiriog, byd-eang a macrocosmig. Mae’n rhodd cael gwahoddiad i ystyried y syniadau hyn ar y cyd â’r Amgueddfa Ryfel Ymerodrol, yn enwedig yn ystod y cyfnod ingol hwn o wrthdaro, a chael gwneud hynny yng Nghymru, gwlad chwedloniaeth a dirgelwch.”
Dywedodd Rebecca Newell, Pennaeth Celf yr Amgueddfeydd Rhyfel Ymerodrol: “Mae Out of this World yn tanio’r dychymyg trwy olygfeydd a synau annisgwyl, gan ymgysylltu’n haniaethol â phrofiadau gweledol o wrthdaro, a gobaith yn y pen draw. Trwy Gronfa Etifeddiaeth 14-18 NOW IWM, rhaglen gomisiynu celfyddydau genedlaethol yr Amgueddfeydd Rhyfel Ymerodrol, rydym yn edrych ymlaen at gyflwyno’r gwaith newydd toreithiog a llawn awyrgylch hwn gan Heather Philipson ar y cyd ag Oriel Glynn Vivian.”
Dywedodd Karen MacKinnon, Curadur Oriel Glynn Vivian: “Rydym wrth ein bodd yn cael cydweithio â Heather Phillipson. Mae ei gwaith yn aml yn wrthdaro rhwng deunyddiau gwahanol iawn a ffyrdd gwahanol iawn o weithio. Clystyrau swrealaidd, barddonol, yn ymwneud â syniadau taer a radical ein hoes. Bydd y prosiect hwn yn creu naratifau a sgyrsiau newydd mewn ffyrdd y gall neb ond artistiaid eu creu, a bydd yn rhoi cyfleoedd anhygoel i gynulleidfaoedd ymgysylltu a chyfranogi mewn gwaith celf unigryw y gellir ymgolli’n llwyr ynddo.
“Mae Cronfa Etifeddiaeth 14-18 NOW IWM yn llwyr gefnogi ac yn caniatáu i greadigrwydd ac uchelgais ffynnu, gan greu rhwydweithiau ac etifeddiaeth lleol a chenedlaethol hirhoedlog ac mae’n ein hatgoffa ni o bwysigrwydd a gwerth celf a diwylliant yn y cyfnod cythryblus hwn.”
Ochr yn ochr â’r comisiwn newydd hwn mae gweithiau celf yn cael eu harddangos, wedi’u dethol gan yr artist, o blith Casgliad yr Amgueddfeydd Rhyfel Ymerodrol (IWM) ac Oriel ac Amgueddfa Castell Cyfarthfa, yn ogystal ag arddangosfa o gasgliad parhaol Oriel Glynn Vivian.
I gyd-fynd â rhaglen Heather Phillipson: Out of this World, ceir rhaglen gyhoeddus, dysgu ac ysgolion, gan gynnwys gweithdai cymunedol creadigol, llwybrau oriel, digwyddiadau gyda’r hwyr, a sgyrsiau gan artistiaid a’r diwydiant. I gael rhagor o wybodaeth, cofrestrwch i fod yn rhan o restr bostio Oriel Glynn Vivian.
Mae Heather Phillipson: Out of this World yn gomisiwn gan Gronfa Etifeddiaeth 14-18 NOW IWM trwy bartneriaeth ag Oriel Gelf Glynn Vivian.
Heather Phillipson: Out of this World, Dyddiadau’r Arddangosfa, 12 Gorffennaf 2024 – 26 Ionawr 2025
Oriel Glynn Vivian Gyda’r Hwyr, Dydd Iau 11 Gorffennaf, 5:30pm – 8:00pm
Anthony Shapland, Detholiad Gwobr Wakelin 2021, Cinzia Mutigli
